Акафист епископу Тихону Воронежскому чудотворцу

Кондак 1
Избранный угодниче Христов, Святителю отче Тихоне, возсиявый мирови, яко светозарное светило, прославляюще прославльшаго тя Господа, даровавшаго нам в тебе новаго великаго молитвенника и помощника, скораго недугов душевных же и телесных целителя, похвальное воспеваем ти пение: ты же. имеяй велие дерзновение к Владычице небесе и земли, от всяких нас бед свободи зовущих: Радуйся, Тихоне, великий и преславный Чудотворче.

Икос 1
Ангелов собеседниче и человеков наставниче, ныне, яко Божий служитель, предстоя с вышними лики, Святителю Тихоне, молиши о всех нас Христа Бога нашего и к ведению спасения ны руководиши. Сего ради благодарне во умилении вопием ти: Радуйся, пречестное Святыя Троицы селение; Радуйся, чистотою и святынею Ангелом уподобление. Радуйся, светильниче Божественнаго света; Радуйся, всесветлое благодати приятелище. Радуйся, присный пред Господем наш заступниче; Радуйся, теплый пред Ним о нас молитвенниче. Радуйся, скорый в нуждах и скорбех сущим помощниче; Радуйся, добрый душ наших наставниче. Радуйся, Церкве православный утверждение; Радуйся, всея земли Российския светлое озарение. Радуйся, Воронежския паствы похвало; Радуйся, обители Задонския украшение. Радуйся, Тихоне, великий и преславный Чудотворче.

Кондак 2
Видя в творениих, аки в зерцале, премудрость и славу Творца всяческих Бога, к Нему духом выну возносился еси, Богомудре: светом же благоразумия твоего и нас озари, да вопием купно с тобою: Аллилуиа.

Икос 2
Разум твой Божественными ученми просветил еси, Богомудре Тихоне, отвергнув всяко плотское мудрование, с разумом же и волю повинул еси Господеви: тем же сосуд чист и селение Духу истины явился еси. Сего ради, яко богомудраго наставника, тя ублажающе, воспеваем сице: Радуйся, Божия премудрости созерцателю и проповедниче; Радуйся, яко от тленнаго мира духовное сокровище, услаждающее души верных, собрал еси. Радуйся, истиннаго благословия златословесный учителю; Радуйся, яко уста Христовы, источающа словеса жизни вечныя, был еси. Радуйся, закона Божия от всея души твоей взыскавый; Радуйся, свидений и оправданий Господних возжадавый. Радуйся, яко к небеси ведущими стезями невозвратно шел еси; Радуйся, яко на высоту добродетелей возшел еси. Радуйся, яко мысленным оком к невечернему свету — Христову выну взирал еси; Радуйся, яко видения пренебеснаго света сподобился еси. Радуйся, Божия разума исполненный; Радуйся, благодатию Духа Святаго приосененный. Радуйся, Тихоне, великий и преславный Чудотворче.

Кондак 3
Сила Вышняго чудесно спасе тя от напрасныя смерти и яве показа тя сына Царствия Христова суща, Святителю отче Тихоне, егда, во всю нощь пребывающути в благомыслии, внезапу небеса отверзошася и явися свет неизреченный. И тако премирныя радости исполнився, возопил еси Богу: Аллилуиа.

Икос 3
Имея веру несумненну и помысл чист, вся красная мира сего презрел еси, Тихоне блаженне, и в образе Ангельстем неленостно послужил еси Господу Богу: тем же, аки звезда путеводная, светиши всем, хотящим жити в преподобии и вопиющим тебе: Радуйся, житию безплотных поревновавый; Радуйся, подвигом древних святых отец подражавый. Радуйся, яко приим крест, Христу последовал еси; Радуйся, яко образ страстей Его в сердце твоем преднаписал еси. Радуйся, яко вся козни диавола силою креста Господня разрушил еси; Радуйся, яко похотения греховная молитвою и терпением победил еси. Радуйся, яко угождал еси Господу всяким благоугождением; Радуйся, преукрашенная храмино добродетелей. Радуйся, красото смиренномудрия и воздержания; Радуйся, образе кротости и послушания. Радуйся, постников веселие и иноков похвало; Радуйся, болий в лике преподобных. Радуйся, Тихоне, великий и преславный Чудотворче.

Кондак 4
Бурю внутрь имея помышлений, недоумеваше раб Божий, что речет о нем Господь, егда людие проразумеваху его достойна быти святительства: обаче всего себе Христу Богу предаде. Тому о всех благодарение возсылая, зовый: Аллилуиа.

Икос 4
Слышавше людие о благоплодных добротах души твоея, Богоносне Тихоне, желанием вожделеша тя видети на степени святительства. Егда же собор Архиереев недоумеваше вдати тебе жезл пастырства, зане юн был еси, абие трикраты свыше свидетельствован еси, яко достойный сосуд Божественныя благодати, вся немощная врачующия и оскудевающая восполняющий. Тем же, дивящеся чудному промышле-нию Бога о тебе, приносим ти сицевая благохваления: Радуйся, Архиерею, от Самого Господа пронареченный; Радуйся, мужу желаний, пасти стадо Христово свыше избранный. Радуйся, Пастыреначальника Иисуса благоволение; Радуйся, Иерархов украшение. Радуйся, яко от утра жизни твоея на стражбу словеснаго стада избран был еси; Радуйся, яко и до вечера жития твоего сущия в вере неленостно назидал еси. Радуйся, пастырю добрый, яко готов был еси душу твою положити за овцы своя; Радуйся, многосветлый Церкве светильниче. Радуйся, Апостолов сопричастниче; Радуйся, великих святителей сопрестольниче. Радуйся, яко первопрестольнику паствы твоея, Митрофану освященному, равночестен показался еси, Радуйся, яко преемником твоим верный ко спасению путеводитель соделался еси. Радуйся, Тихоне, великий и преславный Чудотворче.

Кондак 5
Боготечная звезда явился еси всем христианом, Святителю отче Тихоне: деянми бо и ученми твоими не точию во дни живота твоего добре назидал еси паству твою, но и по честнем успении твоем всем верным показуеши правы стези Царствия Христова, и научаеши присно взывати к Богу: Аллилуиа.

Икос 5
Видя себе поставлена на степени архиерейства, Святителю отче наш Тихоне, не дал еси сна очам твоим, ниже веждом дремания, поставляя пастве твоей пастыри смысленны и вся люди управляя ко спасению. Мы же, ведуще тя быти пастыреначальника богомудренна и строителя дому Божия добра, взываем к тебе: Радуйся, крепкое кормило Христовы Церкве; Радуйся, нивы Господни удобрение. Радуйся, верных надежное утверждение; Радуйся, неверных богомудренное обличение. Радуйся, Христова вертограда делателю неусыпный; Радуйся, душетленному зверю стадо твое расхищати не попустивый. Радуйся, храмов благолепия рачителю; Радуйся, верный тайн святых строителю. Радуйся, яко стражей дому Божия на стражбу недремленну уготовал еси; Радуйся, яко пастырем проповедати благовременне и безвременне заповедал еси. Радуйся, благий и верный рабе Божий; Радуйся, яко вшел еси в радость Господа твоего. Радуйся, Тихоне, великий и преславный Чудотворче.

Кондак 6
Проповедник воистину благочестия явился еси, Святителю отче наш Тихоне, егда увидев безстудное празднество во граде твоем, яко добр воин Христов, притекл еси на игрище бесовское и словом вразумил еси заблуждшия, научая всех взывати Единому Истинному Богу: Аллилуиа.

Икос 6
Возсиял еси, яко звезда лучезарная, Воронежской пастве, блистанием учений твоих озаряя души верных и разгоняя тму нечестия и суеверия. И ныне сладостию писаний твоих насыщаеши вся алчущия и жаждущия правды, иже благодарне и взывают к тебе: Радуйся, наставниче всех к небеси направляяй; Радуйся, проповедниче покаяния, заблуждших к исправлению воззываяй. Радуйся, славы Божия истинный ревнителю; Радуйся, страннаго суеверия потребителю. Радуйся, яко душетленныя обычаи обличил еси; Радуйся, яко безстудное игрище упразднил еси. Радуйся, имже сатана посрамися; Радуйся, имже Христос прославися. Радуйся, яко и по смерти твоей души верных назидаеши в благочестии сладостию писаний твоих; Радуйся, яко в них сокровище, драгоценнейшее злата и сребра, нам оставил еси. Радуйся, златоусте Российския Церкве; Радуйся, паствы твоей присное радование. Радуйся, Тихоне, великий и преславный Чудотворче.

Кондак 7
Хотяй невозбранно возноситися духом в горняя селения, благотишие пустыни возлюбил еси, Богоносе отче Тихоне, и тамо вселився, сподобился еси видети Господа, от иконы, аки от Голгофы, к тебе грядуща, вопия к Нему: Аллилуиа.

Икос 7
Новым подвигом духовным вдал еси себе, Богоносе отче Тихоне, егда всесовершительнаго Духа благодать призва тя служити Господеви в безмолвии: имый бо помысл превыше мира, возлюбил еси смирение глубокое и молитвы непрестанныя. Сего ради и крепость духовную подаде тебе Подвигоположник Христос и сподоби тя видений благодатных, да и мы, ведуще таковая, ублажаем тя: Радуйся, любителю безмолвия, духом твоим в вышних обитавый; Радуйся, самоотвержение всецелое показавый. Радуйся, во бдениих и молитвах неослабно пребывал еси; Радуйся, безстрастие умерщвлением страстей твоих стяжал еси. Радуйся, Господа распятаго на кресте выну пред собою предзревый; Радуйся, и телесныма очима видети Христа Иисуса сподобивыйся. Радуйся, яко пречистым стопам Его поклонился еси; Радуйся, яко спасительныя язвы Его облобызал еси. Радуйся, исполнь веселия, егда явися тебе Богоматерь купно со Апостолы; Радуйся, яко в славословии ликовствовал еси со Ангелы. Радуйся, таинниче Божий, еще на земли вкусивый небесных благ; Радуйся, Ангеле земный и человече небесный. Радуйся, Тихоне, великий и преславный Чудотворче.

Кондак 8
Странно и велико незлобие показа, Преблаженный, егда един буий и злонравный удари его в ланиту; он же, Агнцу Христу поревновав, до земли поклонися биющему, моля Бога о прощении ему. Тем же дивящеся незлобию его, поем Богу: Аллилуиа.

Икос 8
Весь исполнь любве Христовы, Тихоне благосерде, душу твою полагал еси за други твоя, и аки Ангел Хранитель присущ был еси ближним же и дальным, озлобленныя укрощая, враждующия примиряя, и спасение всем устрояя. Сего ради чтем святую память твою и усердно вопием ти: Радуйся, проповедниче любве, еюже Бог примири Себе человеки; Радуйся, Отче благосердый, взыскавый спасения многих. Радуйся, смирения и незлобия учителю; Радуйся, терпения и миролюбия наставниче. Радуйся, яко за правду претерпел еси заушение; Радуйся, яко за враги твоя умолял еси Господа. Радуйся, егоже любовь победи всяку вражду; Радуйся, егоже незлобие покори буяя сердца. Радуйся, миротворче благословенный; Радуйся, мзду миротворцев наследивый. Радуйся, научивый заповедем Христовым и сотворивый я; Радуйся, великий в Царствии Небеснем. Радуйся, Тихоне, великий и преславный Чудотворче.

Кондак 9
Всем был еси вся, якоже и святый Павел, да всяко некия спасеши, Богомудре: сразсуждая бо немощному естеству человеческому, не укорил еси брата твоего, неподобающия посту снеди ядуща, но абие седши купно с другом его, от трапезы тоя мало вкусил еси. Поминающе убо таковое благоснисхождение твое, вопием к прославльшемуся в тебе человеколюбцу Богу: Аллилуиа.

Икос 9
Ветии многовещанныя не возмогут по достоянию изрещи твоих благодеяний множество, Святителю отче Тихоне: щедродательная бо десница твоя всюду досязаше. Мы же, благосердию твоему подражати хотяще, во удивлении взываем к тебе: Радуйся, лучу любве Божия; Радуйся, сокровище милосердия Спасова неистощимое. Радуйся, ближния твоя паче себе возлюбивый; Радуйся, в меньших братиях твоих самого Христа видевый. Радуйся, яко нищия поминая, хлеб твой слешами орошал еси; Радуйся, яко питие твое плачем о них растворял еси. Радуйся, яко имения твоя неимущим расточал еси; Радуйся, яко щедродательная десница твоя николиже оскуде. Радуйся, яко больныя и в темнице заключенныя посещал еси; Радуйся, яко нужды бедных предварял еси. Радуйся, словом и примером затворенныя на благостыню сердца отверзавый; Радуйся, милостивых блаженство от Господа стяжавый. Радуйся, Тихоне, великий и преславный Чудотворче.

Кондак 10
Спастися всем хотяй преблагий Господь яви тя, Святителю отче наш Тихоне, образ жития праведнаго: кто бо не умилится, видя твое безмерное ко всем благосердие. Тем же велию к нам милость Божию славяще, вопием: Аллилуиа.

Икос 10
Стена был еси помощи и заступления всем безпомощным и нападствуемым, Святителю Тихоне, и милосердия неистощимое сокровище. Сего ради славяще Бога, дивнаго во Святых Своих, и тя ублажаем: Радуйся, безкровных пристанище; Радуйся, всех безпомощных скорый помощниче. Радуйся, сирых питателю и призрение; Радуйся, скудных земледельцев снабдение. Радуйся, скорбящим прибежище; Радуйся, печальным утешение. Радуйся, обидимым заступление; Радуйся, обидящих вразумление. Радуйся, угнетенным защитниче; Радуйся, сильным мира сего небоязненный Суда Божия провозвестниче. Радуйся, яко за правду претерпел еси скорби; Радуйся, яко стяжал еси блаженство гонимых ради правды. Радуйся, Тихоне, великий и преславный Чудотворче.

Кондак 11
Пение у гроба твоего угодниче Божий, Святителю отче Тихоне, не умолче от дне блаженнаго успения до дне светлаго прославления твоего: мнози бо ведаху тя Богоносна и равноангельна суща. Ныне же вся Российская земля благодарно вопиет прославльшему тя Богу: Аллилуиа.

Икос 11
Светило быв, вся концы земли Российския озарил еси, Святителю приснопамятне. Егда же приспе время отшествия твоего, Божественнии Ангели прияша святую душу твою и в небесныя обители вознесоша; тело же твое честное Троица вседетельная содела нетленно и источник чудес показа на утверждение православныя веры, на обличение же неверия и суеверия. Тем же, поминающе блаженное успение и велие твое на небеси и на земли прославление, с радостию приносим ти благохваления сия: Радуйся, великий угодниче Божий, течение благочестне скончавый; Радуйся, веру, надежду и любы до конца сохранивый. Радуйся, по трудех странствия земнаго сладце в селениих небесных почивый; Радуйся, яко смерть приявый, тления же не познавый. Радуйся, со Христом, Егоже возлюбил еси, на веки соединивыйся; Радуйся, Царствия Небеснаго и славы вечныя наследниче. Радуйся, яко нетлением мощей твоих спасительную силу воскресения Христова являеши; Радуйся, яко оным зарю общаго воскресения нам показуеши. Радуйся, истины православия несомненное уверение; Радуйся, в Церкви присущия благодати неложное извещение. Радуйся, земнаго отечества твоего новое светило и утверждение; Радуйся, царства православнаго покрове и защищение. Радуйся, Тихоне, великий и преславный Чудотворче.

Кондак 12
Благодать чудес многообразных, вселився в небеси, приял еси от Господа, преблаженне Тихоне. Сего ради подаеши исцеления всем, притекающим к тебе с верою. Мы же, дивящеся в тебе всемогуществу и благости Бога, вопием Ему: Аллилуиа.

Икос 12
Поюще дивное прославление святаго телесе твоего, видим тя, Богоблаженне Святителю Тихоне, присно зде источающа потоки чудес, и в удивлении восхваляюще тя, зовем: Радуйся, живоносный источниче, благодать исцелений изливающий нам от всечестныя раки твоея; Радуйся, всех одержимых недуги непостыдное прибежище. Радуйся, слепых прозрение; Радуйся, немых ясное глаголание. Радуйся, яко от одра разслабленныя воздвизаеши; Радуйся, яко стужаемыя от бесов свобождаеши. Радуйся, сухорукия и сляченныя к деланию исправляяй; Радуйся, хромым и ничащим хождение подаваяй. Радуйся, телес наших благосострадательный врачу и хранение; Радуйся, и душ наших к Царствию Небесному возведение. Радуйся, емуже сорадуются Ангели и о немже веселятся человецы; Радуйся, имже Бог дивен во Святых Своих является. Радуйся, Тихоне, великий и преславный Чудотворче.

Кондак 13
О великий и преславный Чудотворче, Святителю Христов отче Тихоне, приими сие похвальное пение от нас недостойных во умилении тебе приносимое, и твоим теплым предстательством у престола Божия испроси нам утверждение в вере и добрых делех, избавление от всех бед и напастей в жизни сей, в смертнем же успении нашем благую надежду спасения, да сподобимся в радости вечней воспевати дивному во Святых Богу: Аллилуиа.
(Этот кондак читается трижды, затем икос 1 и кондак 1)

Молитви епископу Тихону Воронежскому чудотворцу

Молитва первая
О, великий Угодниче Божий и преславный Чудотворче, Святителю отче наш Тихоне! Со умилением преклонше колена и припадая к раце честных и многоцелебных мощей твоих, хвалим, славим и величаем прославльшаго тя Бога, и нам недостойным показавшаго в тебе велию милость, и всеусердно, верою и любовию чтущий святую память твою, молим тя: принеси молитву нашу к вся содержащему и спасающему человеколюбцу Господу, Емуже ты ныне с лики Ангел и со всеми Святыми предстоиши, да утвердит во святей Своей православной Церкви живый дух правыя веры и благочестия, да вси члены ея, чистии от суемудрия и суеверия, духом и истиною покланяются Ему и усердно пекутся о соблюдении Его заповедей, пастырем ея да даст святую ревность попечения о спасении вверенных им людей — право верующия соблюдати, слабый и немощныя в вере укрепляти, неведущия наставляти, противныя обличати. И паки припадающе, с упованием, якоже чада отца нам суща, молим тя, Святителю Тихоне, веруем бо, яко ты, на небесех живый, любиши ны тою же любовию, еюже вся ближняя твоя возлюбил еси, внегда пребывати тебе на земли, испроси у всемилостиваго Господа и всем нам подати дар коемуждо благопотребен и вся, яже к животу временному и вечному полезная, мира умирение, градов наших утверждение, земли плодоносие, от глада и пагубы избавление, от нашествия иноплеменных сохранение, скорбящим утешение, недугующим исцеление, падшим возстановление, заблуждающим на путь истины возвращение, подвизающимся в делех благих укрепление, благоделающим преспеяние, родителем благословение, чадом в страсе Господнем воспитание и научение, наставником ведение и благочестие, неведущим вразумление, сирым, неимущим и убогим помощь и заступление, отходящим от сего временнаго жития к вечному благое уготовление и напутствование, отшедшим блаженное упокоение. Сих всех, наипаче, проси нам, Святче Тихоне, у Щедродавца Бога, яко имый велие к Нему дерзновение: тебе бо стяжахом приснаго заступника и теплаго молитвенника о нас пред Господем, Емуже подобает всякая слава, честь и поклонение. Отцу и Сыну и Святому Духу, ныне и присно и во веки веков. Аминь.

Молитва вторая
О всехвальный Святителю и Угодниче Христов, отче наш Тихоне! Ангельски пожив на земли, ты яко Ангел благий явился еси и в дивнем твоем прославлении. Веруем от всея души и помышления, яко ты, благосердый наш помощниче и молитвенниче, твоими неложными ходатайствы и благодатию, обильно дарованною тебе от Господа, присно способствуещи нашему спасению. Приими убо, ублажаемый Угодниче Христов, и в час сей наша недостойная моления: свободи ны твоим заступлением от облегающаго нас суесловия и суемудрия, неправоверия и зловерия человеческаго. Потщися, скорый о нас предстателю, благоприятным твоим ходатайством умолити Господа, да прибавит Своя великия и богатыя милости на нас грешных и недостойных рабех Своих, да уврачует Своею благодатию неисцельныя язвы и струпы растленных душ и телес наших, да растворит окаменелая сердца наша слезами умиления и сокрушения о премногих согрешениих наших и да избавит ны вечных мук и огня геенскаго; всем же верным людем Своим да дарует в нынешнем веце мир и тишину, здравие и спасение и во всем благое поспешение, да тако, тихое и безмолвное житие поживше во всяком благочестии и чистоте, сподобимся со Ангелы и со всеми Святыми славити и воспевати всесвятое имя Отца и Сына и Святаго Духа. Аминь.

Молитва третья
О святителю, отче наш Тихоне! Услыши нас и потщися благоприятным твоим ходатайством умолити Господа, да пробавит Своя великия и богатыя милости на нас, грешных и недостойных рабех Своих (имена), да уврачует Своею благодатию неисцельныя язвы и струпы растленных душ и телес наших, да растворит окаменелая сердца наша слезами умиления и сокрушения о премногих согрешениях наших и да избавит ны от вечных мук и огня геенскаго, да дарует в нынешнем веце мир и тишину, здравие и спасение, да тако сподобимся, со Ангелы и со всеми святыми, славити и воспевати всесвятое имя Отца и Сына и Святаго Духа, во веки веков.

Молитва четвертая
О великий угодниче Божий и преславный чудотворче святителю отче наш Тихоне! Со умилением припадающе к иконе твоей, молим тя: принеси молитву нашу к человеколюбцу Господу, да дарует же с долгоденствием душевное же и телесное здравие рабам Божиим (имена) и прихожанам святаго храма сего, да пробавит Своя великия и богатыя милости на нас, грешных и недостойных рабех Своих, да растворит окаменелыя сердца наша слезами умиления и сокрушения о премногих согрешениях наших и да избавит ны от вечных мук и огня геенского, да поем и славим неизреченныя щедроты Человеколюбца Бога, Отца и Сына и Святаго Духа, и твое отеческое заступление, во веки веков. Аминь.

Тропарь святителю Тихону Задонскому

Тропарь
От юности возлюбил еси Христа, блаженне, образ всем был еси словом, житием, любовию, духом, верою, чистотою и смирением темже и вселился еси в небесныя обители, идеже предстоя престолу Пресвятыя. Троицы, моли, святителю Тихоне, спастися душам нашим.

Тропарь, глас 4
Православия наставнице, благочестия учителю, покаяния проповедниче, Златоустаго ревнителю, пастырю предобрый, новый России светильниче и чудотворче, паству твою добре упасл еси и писаньми твоими вся ны наставил еси, темже венцем нетления украшен от Пастыреначальника, моли Его спастися душам нашим. 

Акатист на святия мъченик Трифон

Кондак 1

Избранный от Бога и к лику святых сопричтенный, святый мучениче Трифоне! Молися о нас, грешных, Владыце Христу и помогай нам побеждати мир, плоть и диавола, многообразно воюющия на ны, якоже победил еси их благодатию и силою возлюбленнаго тобою Христа, да, избавльшеся от врагов наших видимых и невидимых, благодарственно воззовем ти: Радуйся, Трифоне, скорый помощниче всем, с верою и любовию к тебе притекающим!

Икос 1

Образу благочестия родителей твоих подражая, христианския нравы от лет малых приял еси, святый мучениче, и мал сый леты, стар же разумом, воистину христианин совершен явился еси. Мы же, воспоминающе добродетельное житие твое, восхваляем тя сице: Радуйся, добронравных родителей благочестивый сыне; радуйся, великое их утешение. Радуйся, Ангела твоего Хранителя непрестанное веселие; радуйся, от юности твоея всего себе Богу предавый. Радуйся, от юности Христа возлюбивый; радуйся, от малых лет благодать Божию обильно стяжавый. Радуйся, душу свою непорочну явивый; радуйся, себе самаго в храм Духа Святаго уготовавый. Радуйся, отроком образ жития святаго показавый; радуйся, благочестием твоим верныя возвеселяяй. Радуйся, от малых лет за вся сия Богом возлюбленный. Радуйся, Трифоне, скорый помощниче всем, с верою и любовию к тебе притекающим.

Кондак 2

Видя Господь, яко волею по стези благочестия, в немже от родителей твоих наставлен был еси, течеши, и яко воистинну любиши Бога, сотвори тя в жилище Святаго Духа от лет малых и отверзе уста твоя пети Ему: Аллилуиа.

Икос 2

Силу веры твоея показуя, Владыка Христос дарова тебе, святый мучениче, еще отроку бывшу, дар чудотворений, сего ради вопием ти: Радуйся, от малых лет совершенную любовь к Богу показавый; радуйся, заповедей Его не токмо слышатель, но и делатель от младенчества бывый. Радуйся, от юности твоея добродетели христианския стяжавый; радуйся, от малых лет житием, верою и любовию твоею Богу угодивый. Радуйся, дар исцелений от Него приявый; радуйся, дар той на пользу ближним иждивающий. Радуйся, многоразличныя болезни исцеляющий; радуйся, в недузех облегчение дарующий. Радуйся, страдания в радость обращающий; радуйся, исцеления сия во славу Божию совершающий. Радуйся, теми истину веры православныя показующий; радуйся, теми нас к славословию Бога возбуждающий. Радуйся, Трифоне, скорый помощниче всем, с верою и любовию к тебе притекающим.

Кондак 3

Верою и любовию стяжал еси от Бога власть изгоняти духи нечистыя, мучащия человеки и претящия им воспевати Богу: Аллилуиа.

Икос 3

Видя дарованную ти, святый мучениче, силу Божию, вспять бежаша демони, имиже одержими бяху бесноватии людие. Видящии же сия, воспеваху ти сице: Радуйся, от Бога власть на нечистыя духи приявый; радуйся, силою Божиею сих изгоняющий. Радуйся, врагу человеческому вредити людем возбраняющий; радуйся, козни диавола и ангелов его разрушающий. Радуйся, силу их низлагающий; радуйся, безсилие их являющий. Радуйся, страхом и трепетом их поражающий; радуйся, веры Христовы силу показующий. Радуйся, верных к прославлению Бога воздвигающий, радуйся, в бедах и скорбех сущих прибегати к предстательству святых наставляющий. Радуйся, в нуждах наших обращатися к Богу научающий; радуйся, помощниче наш, Богом нам дарованный. Радуйся, Трифоне, скорый помощниче всем, с верою и любовию к тебе притекающим.

Кондак 4

Восхотев тобою обратити языки от пути нечестия и открыти им путь истинный, ведущий в Живот Вечный, си есть веру истинную, веру православную, даже до Рима из Компсады приведе тя Господь, да и в чертогах царских проповеси Бога и таю многий научиши пети Ему: Аллилуиа.

Икос 4

Хотяй обратити многия на путь спасения, попусти Господь демону вселитися в дщерь цареву, и жестоко мучити и ввергати ю многочастне во огнь и воду. Врачеве ничтоже успеваху и ничимже страдания дщери царевой утолити возмогоша. Егда же и сильнии мира сего и всякую врачебную хитрость ведущии ничтоже возмогоша и исповедаху немощь свою, тогда велением Божиим проглагола диавол, яко един есть, иже изгнати его имать, и се есть Трифон. Тогда прилежно искаху и обретоша его в Компсаде. Грядущу же ему и еще далече от Рима сущу, возопи гласом велиим диавол и изыде, и исцеле девица. Видящии сия дивляхуся и глаголаху: Радуйся, Трифоне, еще далече сущий в бегство диавола обративый; радуйся, яко диавол безсилие свое пред тобою исповеда. Радуйся, молящимся тебе скорый помощниче; радуйся, недугов силою Божиею целителю. Радуйся, оставленных врачами на свои руце приемлющий; радуйся, печали на радость пременяющий. Радуйся, печальным утешение и скорбящим радование посылающий. Радуйся, Трифоне, скорый помощниче всем, с верою и любовию к тебе притекающим.

Кондак 5

Видеша вернии, иже в Риме, чудо, пришествием твоим бывшее, укрепишася в вере своей и воспеша Богу, победившему адскаго змия и дарующему верующим в Него таковую силу: Аллилуиа.

Икос 5

Уверения ища, тебе пришедшу в Рим, святый Трифон, яко ты еси той, егоже убояся демон, моли тя император Гордиан, да явиши и ему и синклиту его, и людем в чувственном виде диавола, и не отреклся еси, но, возложив на ся пост, помолися Господу дний шесть. В день же седмый, пришедшим царю, синклиту и людем, возопил еси: “Тебе глаголю, душе нечистый, во имя Господа моего Иисуса Христа явися семо и покажи свой демонский образ зде сущим, и безсилие свое исповеждь...”. И бысть тако. И зряху вси безобразие демонское и дивляхуся вере святаго, вопиюще: Радуйся, Трифоне, егоже демони ослушатися не могут; радуйся, Трифоне, по егоже велению дуси нечистии в телеснем виде являются. Радуйся, Трифоне, силою Божиею повелевый диаволу исповедати, яко, на христианы, иже святую православную и апостольскую веру содержат, власти не имать; радуйся, Трифоне, емуже возвещено бысть, яко демони власть имут мучити токмо тех, иже своим похотем греховным следуют и дела, угодная диаволу, творят. Радуйся, Трифоне, яко научил еси нас бегати языческаго нечестия; радуйся, Трифоне, яко научаеши всех бегати всякаго греха, в добродетелех же подвизатися. Радуйся, веру православную твердо содержати наставляяй нас; радуйся, хотящим благочестно жити помогаяй. Радуйся, Трифоне, скорый помощниче всем, с верою и любовию к тебе притекающим.

Кондак 6

Видевше, како младо отроча повелевает властно духовом злобы поднебесной, убояхуся мнози, и слышаще от демона и видяще воочию, якову силу имать вера Христова, обратишася к Богу: нечестие же и прочая заблуждения своя отложше, крестишася и усты своими от сердца чиста благодарственно воспеша Богу песнь: Аллилуиа.

Икос 6

Благодаряще тя, царь вложи в руце твои, мучениче, дары и злато, ты же, Христа Бога приобревый ни во чтоже вменил еси вся, яже в мире сем яко блага почитаются, и приял еси дары царевы, да послужиши ближним твоим, и шед во отечество твое Компсаду, дал еси вся нищим, сирым и всем в нужде сущим, непрестанно памятуя, яко расточив богатство земное, тленное, собереши себе на Небеси богатство нетленное, вечное. Мы же, научаемии тобою такожде творити, вопием ти сице: Радуйся, Трифоне, душу свою чужду сребролюбия показавый; радуйся, милосердие души твоея выну являяй. Радуйся, нищих питатель бывый; радуйся, неимущим сострадание показавый. Радуйся, заповедь Христа “Просящему у тебе дай” исполнивый; радуйся, и нас исполняти заповеди Божии научивый. Радуйся, якоже шествием в Рим и возвращением своим в Компсаду многих утешивый, ободривый и возвеселивый; радуйся, показавый нам образ, како богатством гибнущим на земли негиблющее богатство на Небеси собирати. Радуйся, ближним служити нас научающий; радуйся, ближних любити нас наставляющий. Радуйся, образ жития праведнаго нам показующий, радуйся, яко правило веры в Бога, надежды на Него, любве к Нему и ближним и прочих христианских добродетелей яви нам собою. Радуйся, Трифоне, скорый помощниче всем, с верою и любовию к тебе притекающим.

Кондак 7

Взыде на престол римский нечестивый царь Декий, и пролияся по вселенней кровь христианская. Приближися время, егда и тебе, святый мучениче, суди Господь подъяти страдания, да кровию и мученичеством своим запечатлееши веру и великую свою любовь к Богу и тем до конца низложиши сопротивныя силы и наставиши многих, да грядут на мучения, радующеся, якоже и ты, страстотерпче, и поюще Богу: Аллилуиа.

Икос 7

Яко укрытися не может град верху горы стояй, тако и тебе, святый мучениче, гонению от Декия царя на христиан бывшу, невозможно бысть укрытися от мучителей, ибо ты, яве без страха Христа всем исповедав, силою слова обращение многих ко Христу устроил и многия в недузех именем Его исцелил еси. Уведевше же о тебе, святый Трифоне, игемон Аквилин, взя тя и пред судищем постави, ты же вся грядущая на тя в руце Бога твоего предал еси, радуяся яко и тя сподоби Господь быти общника страданий его, и вернии, видяще ревность твою по Бозе, вопияху ти: Радуйся, Трифоне, ко спасению многих приведый; радуйся, многих от зловерия к вере истинней, православней обративый. Радуйся, чудесы твоими, силою Божиею содеянными, в вере, ими восприятой, их утвердивый; радуйся, яко действенная вера твоя в Бога выну всем по всей вселенней явися. Радуйся, безмездный врачу, силою Божиею, якоже древле, такожде и ныне всякую болезнь скоро врачующий; радуйся, надеждо оставленных врачами. Радуйся, скорое утешение болящих, на тебя надеясь, с молитвою прибегающих; радуйся, небоязненно проповедавый Христову веру. Радуйся, от неверных за проповедь Христа Бога на мучение ятый; радуйся, не устрашивыйся грядущаго мучения. Радуйся, научающий нас не боятися человеческих прещений; радуйся, во всем на Бога упование возложивый. Радуйся Трифоне, скорый помощниче всем, с верою и любовию к тебе притекающим.

Кондак 8

Услышав, яко ищут тя воини, не утаился еси от них, мучениче, ни в горах, ни в пустынех, но, оградився молитвою и крестом дерзновенно себе предал еси в руце мучителей и с радостию великою стопы твоя направил в Никею, да возвестиши всем веру истинную и наставиши пети Богу Аллилуиа.

Икос 8

Егда вопроси тя игемон на судилище: “Кто еси, кая судьба твоя, и како веруеши?” ты, не обинуяся, отвещал еси ему сице: “Трифон имя мое; отечество — Компсада, судьбы же несть у нас, зане веруем, яко вся Промыслом Божиим бывают. По вере же — христианин есмь, Христос же есть и моя сила, и моя крепость, и слава, и радость моя”. Сие исповедание твое слышаще, ублажаем тя, святый Трифоне, сице: Радуйся, неправедному судилищу дерзновенно представый; радуйся, верующих в Промысл Божий укрепляяй. Радуйся, люди, живот свой судьбе вверяющия, посрамляяй; радуйся, научаяй нас во всем упование наше на Бога возлагати. Радуйся, выну себе быти служителя Христова исповедуяй; радуйся, исповеданием тем веселие верным даруяй. Радуйся, соборища нечестивых исповеданием святым отлучивыйся; радуйся, грядущих мучений за нечестивых исповедание истиннаго Бога не устрашивыйся. Радуйся, истину единую Божественную возлюбивый; радуйся, лжи и отца ея, диавола, отвергийся. Радуйся, Христа своим упованием именуяй: радуйся, Его своею крепостию нарицаяй. Радуйся, Трифоне, скорый помощниче всем, с верою и любовию к тебе притекающим.

Кондак 9
Слышавше твое исповедание, ярости исполнишася нечестивии и прещаху ти ранами и мучением. Ты же, мучениче Трифоне, подъятие страданий за Христа веселием почитая, взывал еси немолчно Богу песнь: Аллилуиа.

Икос 9

Ветия многовещанный Аквилин, видя, яко ты не убоялся еси прещений лютых, яко овча кроткое явися, ища прельстити тя словесы ласкательными, но ничтоже успевая, паки в волка лютаго обращься, усугубляше прещения своя. Ты же тверд и непоколебим пребыл еси благодатию Божиею, воздвизая верных возглашати тебе сицевая Радуйся, прещений лютых не убоявыйся; радуйся, смерти телесной не устрашивыйся. Радуйся, душу свою за веру православную положити не отрекшийся; радуйся, разум совершенный в том положивый, да сохраниши веру истинную во Единаго Бога. Радуйся, не к земней, но к Небесней мудрости устремивыйся; радуйся, игемону, врагу твоему, спасения желавый. Радуйся, к познанию истиннаго Бога привести мучителя твоего тщавшийся; радуйся, проповедниче Христов сладкогласный. Радуйся, христианине, Христом возлюбленный; радуйся, волею на страдания шедый. Радуйся, мучений тех за Христа, яко сокровища, хотевый; радуйся, во время мучений лютых Божественным светом осиянный. Радуйся, Трифоне, скорый помощниче всем, с верою и любовию к тебе притекающим.

Кондак 10

Услышав тя глаголавша, яко не исповедующих истинныя, православныя веры жребий есть огнь неугасимый, зело разгневася Аквилин и повеле тя, святый Трифоне, повесив, бити; ты же, в повелении сем услышав Господень глас, призывавший тя на страдальческий подвиг, возопил еси Богу: Аллилуиа.

Икос 10

Яко свеща огнем возгарается, тако душа твоя, святый Трифоне, возгореся любовию к возлюбившему тя Богу, и, услышав повеление игемона, еже на тя, сам совлекл еси ризы твоя и тело твое предал еси в руце мучителей, да сотворят вся, яже повеле игемон. Зряще таковую ревность твою по Бозе, вси вернии глаголаху: Радуйся, с веселием уготовавый себе к приятию ран за Христа; радуйся, риз своих совлекийся ради обнаженнаго некогда за грехи наши Искупителя. Радуйся, добровольно в руце мучителей себе предавый, Христу подражая; радуйся от них связанный и повешенный на мучение. Радуйся, приявый за Христа лютая ударения; радуйся, три часа терпевый нещадное биение. Радуйся, мучиму бывшу, ни единаго стенания и ни единаго гласа испустивый; радуйся, биения, узы, раны, опаления и иныя многоразличныя страдания претерпевый. Радуйся, в молчании приявый ударения, от них же ранами изъязвися тело твое; радуйся, страданием своим силу Божию прославивый. Радуйся, терпением своим мучителей посрамивый; радуйся, подвигом своим христиан возвеселивый. Радуйся, Трифоне, скорый помощниче всем, с верою и любовию к тебе притекающим.

Кондак 11

Видеша терпение и подвиг твой, святый Трифоне, еще же и адамантову крепость твою, и прославиша предстоящии людие Подвигоположника Христа Бога песнию: Аллилуиа.

Икос 11
Яко стену тверду и непоколебиму виде тя нечестивый судия, обаче не прослави Бога, даровавшаго тебе крепость сию, но паче тщашеся склонити тя и лестию и страхом смерти, да принесеши жертву бесовом. Ты же, святый мучениче, исповедав во ушию всех веру Христову, обличил еси безумие гонителей и показал еси мудрость тех, иже во Христа веруют; игемон же, измышляя на тя иная мучения, повеле тя со столпа сняти и, привязав к коню своему, влече за собою. Мы же потщимся прославити страдания твоя: Радуйся, уязвленный телом и за конем быстро влекомый, радуйся, хлад зимний претерпевый Радуйся, научаяй нас в скорбех земных ум свой к Богу устремляти; радуйся, наставляяй в мире сем хладном согреватися любовию, яже к Богу. Радуйся, делом нам показуяй, како подобает ни во чтоже вменяти скоропреходящия на земле страдания; радуйся, любве и милосердия ко всем людем исполненный. Радуйся, ради любве тоя за враги своя молитвы Богу возносивый; радуйся паки в темницу вверженный и в заточении лютом томление, муку и болезни претерпевый. Радуйся, ясно являющии, яко лютейшая страдания земная ничтоже суть, аще к Богу прибегают людие и Бога ради терпят скорби и раны; радуйся, на усекновение главы твоея радостно шедый и пред усекновением тем в руце Бога твоего, Егоже ради вся лютая подъял еси, душу свою святую предавый. Радуйся, прежде усекновения моливыйся о всяком, иже воспоминати тя и в память твою святыя жертвы приносити будет, да услышит его Господь и всякое прошение его исполнит; радуйся, по успении твоем в видении повелевый погребсти тя во отечествии твоем, научая тем и нас свое отечество любити. Радуйся, Трифоне, скорый помощниче всем, с верою и любовию к тебе притекающим.

Кондак 12
Не токмо на земли, святый мучениче, был еси помощник и заступник всем, твоея помощи требующим, но и по смерти не престаеши избавляти от бед к тебе с верою и любовию притекающих, якоже избавил еси царского гнева болярина Трифона, егда внезапу явился ему на коне и дал еси ему отлетевшаго царскаго сокола. Оный же Трифон сокольник на месте сем, идеже ему от тебе помощь явися, во благодарение тебе за избавление свое воздвиже святый храм во имя твое, мучениче Трифоне. Мы же благодеяния от тебе бывшая воспоминающе, возносим благодарственную Богу песнь: Аллилуиа.

Икос 12

Поюще твоя многоразличная чудеса, твою дивную и скорую помощь, яко никогоже усердно прибегающаго к тебе с верою, любовию и упованием никогда же отринул еси, но всех к тебе притекающих и пред святою иконою твоею смиренно молящихся от внезапных бед и скорбей избавляеши, прочее время живота их во благо устрояеши, недузи врачуеши, печали утоляеши и комуждо в бедах и скорбех к тебе припадающему помощь и ослабу даруеши, благодарне восхваляем тя сице: Радуйся, наша моления и прошения приемляй, радуйся, за ны пред Престолом Божиим молящийся. Радуйся, от Бога милости нам непрестанно просящий; радуйся от нечаянных бед и зол непреложное наше избавление. Радуйся, от бед и напастей, движимых на ны грех ради наших, скорое прибежище, радуйся многия слезы от скорби проливаемыя, изсушивый. Радуйся, многия печали утоливый; радуйся, яко никтоже припадый к святей иконе твоей тощь от нея отъиде. Радуйся, всякаго притекающаго к тебе под кров свой и заступление приемляй; радуйся, здравия требующим скорое исцеление. Радуйся, оставленных врачами и ради неисцельных и тяжких недуг своих чающих себе смерти, скорое и безмездное врачевание, радуйся, и ныне, якоже и древле, живу ти сущу, неизсякаемый источниче неизчетных и многообразных чудотворений. Радуйся, Трифоне, скорый помощниче всем, с верою и любовию к тебе притекающим.

Кондак 13

О святый мучениче Трифоне! Приими сие малое, обаче от любящих и благодарных сердец приносимое тебе наше моление, вознеси ко Господу Богу теплыя молитвы твоя за ны, недостойныя: болящия исцели, печальныя утеши, заблуждшия вразуми, бедствующим помози, и вся нам потребная для здравия телеснаго и спасения душевнаго у Бога Щедродавца испроси, наипаче же избави нас от лукавых бесов, да памятуя выну твоя дивная о нас заступления, прославим Бога, даровавшаго нам таковаго молитвенника, целителя и чудотворца, воспевающе песнь: Аллилуиа.

(3 пъти, после икос 1 и кондак 1)

Кондак 1

Избранный от Бога и к лику святых сопричтенный, святый мучениче Трифоне! Молися о нас, грешных, Владыце Христу и помогай нам побеждати мир, плоть и диавола, многообразно воюющия на ны, якоже победил еси их благодатию и силою возлюбленнаго тобою Христа, да, избавльшеся от врагов наших видимых и невидимых, благодарственно воззовем ти: Радуйся, Трифоне, скорый помощниче всем, с верою и любовию к тебе притекающим!

Икос 1

Образу благочестия родителей твоих подражая, христианския нравы от лет малых приял еси, святый мучениче, и мал сый леты, стар же разумом, воистину христианин совершен явился еси. Мы же, воспоминающе добродетельное житие твое, восхваляем тя сице: Радуйся, добронравных родителей благочестивый сыне; радуйся, великое их утешение. Радуйся, Ангела твоего Хранителя непрестанное веселие; радуйся, от юности твоея всего себе Богу предавый. Радуйся, от юности Христа возлюбивый; радуйся, от малых лет благодать Божию обильно стяжавый. Радуйся, душу свою непорочну явивый; радуйся, себе самаго в храм Духа Святаго уготовавый. Радуйся, отроком образ жития святаго показавый; радуйся, благочестием твоим верныя возвеселяяй. Радуйся, от малых лет за вся сия Богом возлюбленный. Радуйся, Трифоне, скорый помощниче всем, с верою и любовию к тебе притекающим.

Молитва первая
О святый мучениче Христов Трифоне, скорый помощниче и всем к тебе прибегающим и молящимся пред святым твоим образом скоропослушный предстателю! Услыши ныне и на всякий час моление нас, недостойных рабов твоих, почитающих святую память твою во всечестнем храме сем, и предстательствуй о нас пред Господем на всяком месте. Ты бо, угодниче Христов, в великих чудесех возсиявый, источаяй цельбы притекающим к тебе с верою и сущия в скорбех человеки заступаяй, сам обещался еси прежде исхода твоего от жития сего тленнаго молитися за ны ко Господу и испросил еси у Него дар сей: аще кто в какойлибо нужде, печали и болезни душевней или телесней призывати начнет святое имя твое, той да избавлен будет от всякаго прилога злаго. И якоже ты иногда дщерь цареву, в Риме граде от диавола мучиму, исцелил еси, сице и нас от лютых его козней сохрани во вся дни живота нашего, наипаче же в день последняго нашего издыхания предстательствуй о нас. Буди нам тогда помощник и скорый прогонитель лукавых духов, и к Царствию Небесному предводитель. И идеже ты ныне предстоиши с лики святых у Престола Божия, моли Господа, да сподобит и нас причастники быти присносущнаго веселия и радости, да с тобою купно прославляем Отца и Сына и Святаго Утешителя Духа во веки. Аминь.

Молитва вторая

О святый мучениче Христов Трифоне, услыши ныне и на всякий час моление нас, раб Божиих (имена), и предстательствуй о нас пред Господем. Ты некогда дщерь цареву, во граде Риме от диавола мучиму, исцелил еси: сице и нас от лютых его козней сохрани во вся дни жития нашего, наипаче же в день последняго нашего издыхания предстательствуй о нас. Моли Господа, да сподобит и нас причастники быти присносущнаго веселия и радости, да с тобою купно удостоимся славити Отца и Сына и Святаго Утешителя Духа во веки веков.